唔知你有無發覺沖涼沖耐咗，又或者游完水之後，啲手指會變皺？好多人以為係因為皮膚吸水，所以啲手指浸水浸得耐就會變皺。不過，原來科學家發現，呢個現象原來係因為皮膚下面嘅血管收縮，甚至同人類「進化」有關！
英國紐卡索大學（Newcastle University）神經科學研究所團隊做咗個實驗研究，搵咗兩組人，一組保持雙手乾爽，另一組將雙手浸入水入面30分鐘，之後叫佢哋用手指公同食指拎起拿彈珠等有乾有濕嘅物品。實驗最後發現，手指浸水浸到皺皮嘅人，係較容易同較快就可以拎起濕咗嘅嘢。
研究團隊嘅領導Tom Smulders話，佢哋研究認為人類手指腳趾浸水後變皺，係為咗增加手指嘅摩擦力，方便人類喺濕滑表面活動，甚至有可能係人類嘅進化，去適應環境。